11 de outubro de 2017

BAROSA LÍQUIDA

Desde a biblioteca do cole animamos ao noso alumnado a participar na proposta que nos fixo chegar a organización do Festival Barosa líquida.
Baixo o lema do certame, "Todo o que cae na rede é peixe" pediamos a elaboración plástica "dun peixe".

Mirade que traballos máis lindos trouxeron!
Grazas a todos e todas polas vosas aportacións!



 
Podedes gozar das variadas actividades deste festival este domingo, 15 de outubro, na Barosa. 

Velaquí tedes o cartaz do evento.

Un saúdo,
MIMI.
 

14 de setembro de 2017

Concerto didáctico da BXB

Esta mañá gozamos dun interesante concerto didáctico, O país dos instrumentos, a cargo de compoñentes da Banda de música xuvenil de Barro, algúns deles mestres e mestras da Escola de música do noso Concello.
Por xentileza do Concello, membros de Protección Civil escoltaron a nosa subida á Nave da Música que foi cedida para a realización desta actividade. 

Manuel Fariña actuou de narrador ademais de amosarnos algúns instrumentos de percusión e a trompa; Iván amosou como sona a trompeta; Óscar, o trombón e o bombardino; Marcos, percusión, o óboe e o corno inglés; Anabel, o fagot; Alejandra, o clarinete; Martín, o saxo; Ana, a frauta travesa e Laura, o cello.
No seguinte vídeo podedes ver unha escolma fotográfica da súa actuación.



Que ben o pasamos!
Moitísimas grazas!

Un saúdo
MIMI

12 de setembro de 2017

Salón do libro, 2018

A XIX edición do Salón do Libro Infantil e Xuvenil de Pontevedra xa está en marcha con importantes novidades.
A primeira delas chega da man dalgunhas librerías da cidade cunha iniciativa que se chama "A túa librería recomenda" e na que cada semana, a través das redes sociais, recomendarán unha obra literaria relacionada co tema da vindeira edición do Salón: "Mulleres de conto"

O pasado sábado a librería Seijas deu inicio a esta iniciativa coa recomendación de Anagnórise, obra de Mª Victoria Moreno (autora homenaxeada no Día das Letras Galegas 2018)

Dende a nosa biblioteca agradecer á súa libreira, Nenuca, a súa sempre xenerosa colaboración cos equipos de Bibliotecas Escolares.

Un saúdo.
MIMI

28 de xullo de 2017

Acto de Graduación e entrega de orlas.

Na última semana de clase celebramos no noso centro o acto de Graduación e entrega de orlas ao alumnado de 6º curso de Educación Infantil primeiro, e posteriormente ao alumnado de 6º de Primaria. Este ano por vez primeira e debido ao incremento de alumnado quixemos separar ambos actos para recibir con maior comodidade ás familias d@s graduad@s.
Amosamos a continuación un vídeo resumo dstes actos.



O acto de entrega de Primaria estivo amenizado pola Banda da Escola de Música de Barro ( a maioría alumnado do noso centro) , dirixida por Alberto Busto.
Fixérono moi ben!



Parabéns a todos e todas!!
Vémonos en Setembro!
Un saúdo,
MIMI

12 de xullo de 2017

Vídeo da Entrega do IX Premio MIMI

Aquí podemos amosar xa un vídeo resumo do acto de entrega do noso IX Premio MIMI ao Persoeiro do Ano que este ano lle foi concedido a "Migallas Teatro". 
O alumnado de 5º curso, responsables do Proxecto, presentou o evento e preparou unhas bonitas coreografías para cantar e bailar neste acto. Un grandísimo traballo que María e Carlos, integrantes de Migallas, souberon recoñecer e agradecer.



Un saúdo.
MIMI

6 de xullo de 2017

Xogamos, cantamos e bailamos no Roteiro Tonucci

O alumnado de 1º e 2º nivel desplazouse a Pontevedra para participar nesta actividade organizada pola Deputación Provincial. O roteiro debe o seu nome ao pedagogo italiano FRATO, acrónimo de Francesco Tonucci, defensor nas súas teses das "Cidades dos nenos e das nenas" como espazos que deben ser deseñados á medida para a rapazada para que poidan ser aproveitados tamén polo resto da cidadanía, e que ten como claro exemplo a cidade de Pontevedra.
Neste roteiro acompañounos o grupo "Migallas Teatro" ( o noso actual Premio MIMI ) e con eles "Xogaron cantaron e bailaron en Pontevedra!"
O roteiro iniciouse no Pazo da Deputación Provincial onde recibiron unhas biseras como agasallo para protexerse do sol da mañá e continuaron cara o Monumento aos heroes de Ponte Sampaio.
Continuou este roteiro por distintas plazas e lugares do centro histórico. Detivéronse na Plaza de España onde celebraron un "Consello das nenas e dos nenos" no que expresaron desexos e propostas para mellorar a nosa localidade, Barro.
 Cantaron e xogaron tamén na Plaza de Santa María e na Plaza de Méndez Núñez.
 Para terminar a mañá con xogos populares (e con materiais reciclados) na Plaza da Pedreira, diante do Pazo de Mugartegui.

 Podedes mirar máis imaxes e ler máis sobre esta saída no blog de 1º e 2º nivel:
https://amorruibalprimeirociclo.blogspot.com.es/2017/07/roteiro-tonucci.html

Foi unha actividade moooi interesante!
Pasámolo xenial!
Un saúdo,
MIMI




5 de xullo de 2017

Participamos en LUDANTIA

O noso centro participa en LUDANTIA, a "I Bienal Internacional de Educación en Arquitectura para la Infancia y la Juventud" que vai ter lugar en Pontevedra no ano 2018.
O último trimestre deste curso, e enlazando co tema das Artes, realizouse a primeira acción deste proxecto no noso centro. Colaboran con nós para levalo adiante Sheila García Prado, Arquitecta, e David Fidalgo Omil, Graduado en Belas Artes.




Todo o alumnado do centro colaborou, dando propostas de mellora para os patios escolares. A partir da necesidade de acondicionamento do espazo e froito dunha reflexión nas aulas, cada quen reflexou a súa idea na plantilla que lle presentamos. Chamamos a esta acción "Repensando os patios"


Posteriormente decidíuse que sería o patio de Infantil, e o alumnado deste ciclo educativo en particular, o que levaría o peso da actividade nas sucesivas accións. 
Por esa razón desenvolvéronse varios obradoiros, o primeiro de movemento no espazo e recoñecemento no mapa para no segundo pasar da representación do plano ao espazo coa creación dun muro vertical.

No último dos obradoiros deste trimestre, @s cativ@s de infantil prepararon uns bonitos tarros con envases plásticos con moito esmero e posteriormente plantaron neles diversas plantas aromáticas para crear un bonito xardín vertical nun dos frentes do seu patio.

Esta última acción tivo difusión na prensa nos últimos días do curso:
http://www.farodevigo.es/portada-pontevedra/2017/06/24/ceip-amor-ruibal-bienal-arquitectura/1704748.html


Un saúdo,
MIMI

30 de xuño de 2017

Agasallos para o alumnado de Infantil.

A pasada semana o alumnado de Infantil do noso centro acudíu á Biblioteca para recibir de mans do alcalde de Barro uns agasallos pola participación no concurso de contos "Cóntame un conto, veciño" que organizan conxuntamente os concellos de Barro e Portas.


Diana (mamá de Noa) e Adán acompañaron a Pili (A informadora Xuvenil da BP do concello) para contarnos un conto. Diana traía na súa maleta á ratiña Luisa para contarnos o conto do rato "Paco" de Paula Carballeira.

Gustounos moitísimo!

A continuación, o Sr alcalde, Xosé M. F. Abraldes, fixo entrega dos agasallos. O/A responsable do día foi quen recolleu das súas mans un paquete cuns libros e un puzzle para cada aula.

No blog de Infantil podedes mirar un fermoso vídeo resumo de esta actividade.

Moitísimas grazas ao Concello e OMIX por traballar en prol da formación d@s cativ@s!!

Un saúdo
MIMI

29 de xuño de 2017

En Infantil tamén investigamos

No blog de infantil, PEQUECHOLANDIA, ofrécennos dúas entradas referidas aos proxectos que estiveron desenvolvendo neste último trimestre.
O alumnado de 4º curso de infantil (3 anos) nos amosa un exemplo co seu Proxecto de Arte:

 Unha das clases de 6º curso de infantil (5 anos) nos amosa o seu proxecto da mascota.

Un saúdo,
MIMI

26 de xuño de 2017

Alumnado de 4º expón os seus proxectos na biblioteca



O alumnado de 4º curso investigou sobre o funcionamento das máquinas simples: o plano inclinado, a panca e a polea  e, cos produtos que elaboraron, montaron unha pequena exposición na biblioteca. 
En cada aula prepararon tamén uns xogos "conectores" para practicar o nome das comunidades autónomas e dos ríos españoles. Todos estes traballos elaborados dentro do proxecto BARRRO e coa premisa da reutilización de materiais.









No seu blog teñen máis información:
http://amorruibalsegundociclo.blogspot.com.es/2017/06/traballos-do-alumnado-de-4-e-b-con.html

Un grandísimo traballo!!

Un saúdo.
MIMI